سياسی عقلانيت

عقل و تدبيرينن بير ايشی قاباغا آپاماغی آتا و بابالاريميز بيزه تاپيشيريبدی و ياشاييشداکی تجروبه لريميزده بو مساله نی بيزه آيدينلاديب و سياست عرصه سينده ده عقل و عقلانيتينن ايشله مک و درايتينن چاليشماق وايشی قاباغا آپارماق و اوغور قازانماق اوزنو گوجلو شکيلده گوستريبدير.
کوردلرين عراقدا اوغورقازانماقلارينين بير فاکتورودا سياسی عقلانيتدن فايدالانماقلاريدی و ايشلرينی های و کوی سيز قاباغا آپاريب و رقيبلرينن چنه وروب و گوجلو شکيلده پوئن آليب و اوز ايسته کلرينی قاباغا آپارديلار. بونلارين بو ايشلری اگر سه ده آمريکانين داياق دورماسينندا بونا اضافه ائده ک چوخ عقلانی شکيلده و يئر آلتی گورولدو و گله جکده اوز تاثيرلرين منطقه ده و اورتادوغودا گوستره جکلر. عراقدا اولان کوردلر سياسی تجربه لری اساسيندا هله ده آشکارا آيری اولکه لرده ياشان کوردلردن حيمايت ائتمه ييبلر و قونشو اولکه لرين اللرينه بهانه وئرمه ييبلر بو ايشلر بونلارين عقلانی داورانماقلارين و درايتينن ايش گورمه کلرين نيشان وئريب.
ميللی فعالارين چوخونون هم ديشاريدا و هم ايچريده سياسی و ديپلوماتيک داوراناماماقلاری بوتون ميللی منافعميزی جيدی شکيلده خطر ساليب و بيزيم ساده ليغيميزی سياست عرصه سينده آيدين شکيلده دوشمانلاريميزا گوستريبدير و ميللی منافعنی اوز حزب و پارتينميزين گوزلوگوندن باخيب و ميللتيميزی يانديريب و اوزوموزن ميللی منافعميزی پوچا چيخارتميشيق و آذربايجاندا اولان بو انرژينی هدر وئريب و بير يئره ييغانماميشيق.
سياسی بير فعاليت گره ک عقلانيت و درايتينن ياناش اولا و احساسی ايشلر سياسی فعاليتين ثمرين آرادان آپارار و هميده هامی چاليشمالاريميز گره ک ميللی منافع اساسيندا اولا و اگر ميللی منافعميزی بير فعاليت خطر سالسا هاميميز قاباغين آلمالييق و جمعی فعاليتييميز لازيمدير کی بير عقلی اجماع اساسيندا اولا و بير جمعی تصميم اساسيندا ميللی ايسته کلريميزی قاباغا آپاريب و هدفلريميزی قوروياق.
مشورت، سياسی عقلانيتين اونملی قاناتيدیر و هر کس کی مشورت ائده قديمدن دئيبلر کی ضرر گورمز و ميللی فعاليتيميزده گره ک مشورت و جمعی تصميم اساسيندا اولسون و اگر بير نفر ده بو تصميمی اعلان ائتسه ده چوخ گوزه ل اولار. و نيشان وئره رکی بيز سياست عرصه سينده پيشيب و شورائی ايشه بويون قويموشوق و الا تک گئديب و اوزوموزو آيريلارين مشورتيندن بی نصيب ائتسه ک مغبون اولاجاييق و ميللی فعاليندا مغبون اولماسی هاميميزا تاثير بوراخاجاق و ميلتيميزی خطر سالاجاق. اودور کی اوزوموزو عقل کل بيلمک و هر سوزی مشورت ائتمه ميک و پيشيرمه ميش آغزيميزدان چيخارتماق اووجوموزون ايچينی دوشمانلاريميزا آچاجاقدير.
هر ايشي گورمه ميشدن قاباق لازيمدير کی ساليب چيخاق کی نقدر آذربايجان ميللتينه فايدا وضرری اولاجاق و اوندان سونرا او ايشی گورمه لييک.
ايندی آذربايجان ميللی فعالاری اگر ايستيرلر اوز گوجلرين و سياسی و ديپلوماتيک داورانماقلارين دونيايا گوسترلر لازيمدير کی بير مشورتی شورا ياراديب و هامی سوزلرين بير ائديب ميللی منافع و واقعيتلر اساسيندا بير نفر اعلان ائتسين و الا منيم گروهوم و سنين گورهون دئسه ک آذربايجانی الدن وئرجه ييک و ميللت فارسلارا نوکر اولماقی سئچه جک و بيزهاميميز بو گمينين صاحيبييق و گمی باتسا هاميميز آرادان گئده جييک. ايندی اورتادوغونون وضعيتی و ايرانين وضعيتی چوخ قاريشيقدی و بيز اگر اوزوموز بير اولماساق صاباح بير مساله قاباغيميزا چيخسا اودوزاجاييق. خصوصا کورد مساله سی کی باتی آذربايجاندا چوخ اونمليدير و بيزيم ناموسوموزو هدف توتوبلار. و اوز گوجوموزه اينانيب و قونشو اومودنا قالمامالييق نييه کی" قونشو اومودونا قالان شامسميز قالار"
منم منملريميزی ساخليياق اووداندان سونرايا ايندی بير اولماق و ايشی قاباغا آپارماق زامانيدير بيز هر طرفدن دوشمان ايچيدنده اولا اولا هله بير اولماساق هانکی زامان بير اولاجاييق؟ اگر ميللتيميز بيلسه بيز بير دئيريک بيزه گولوب و داليميزدا دورموياجاق و فارسلارا نوکر اولماقی ترجيح وئره جک! شمشيرلرميزی دوشمانلاريميزا ايتيدمه لييک و بير بيريميزی کسمه مه لييک! تورکون دوشمانی تاريخ بويو اوزو اولوب سوزونه سون قويمالييق!
ديشاريدا اولانلار و ايچريده اولانلار بير جمعی تصميم توتوب و بير" مشورتی شورا" قورمالييق و بونوندا نتيجه لرينين اعلانينين و رياستين ايچريده و ديشاريدا چوخ تانينميش شخصه تاپيشرمالييق.


ائلخان تورک اوغلو